Вольга Івашына, жонка палітвязня Дзяніса Івашына, перадае ў сацыяльных сетках інфармацыю пра тое, што з палітзняволеных у гарадзенскай турме здзекуюцца і катуюць іх.

Па яе словах, некаторых палітвязняў катуюць холадам:

– Мікалай Аўтуховіч пакутуе ад моцнага холаду. Сядзіць у трох шкарпэтках, спіць ледзь ні ў куртцы. Холад пастаянны. Калі яго прывезлі, быў спачатку каранцін, і, відаць, ён там і застаўся. Сітуацыя прыкладна як і Галіны Дзербыш, яна там ужо некалькі месяцаў, больш за паўгода, адна сядзіць.

Вольга лічыць, што палітзняволеным робяць адмысловы рэжым знаходжання.

– Чалавек пакутуе, здароўе пагаршаецца. Лекі сваякі не могуць своечасова перадаваць, чыняць нейкія перашкоды. Нейкія заявы трэба пісаць, ледзь не за паўгода, пісаць, што табе спатрэбіцца, можа яе прымуць, а можа яна куды-небудзь знікне. Вось такія ўмовы. І ў Уладзіміра Гундара таксама. Не могуць лекі перадаць. Кажуць, нібыта ўсё, што патрэбна, у іх ёсць. На колькі гэта праўда, праверыць немагчыма.

Муж Вольгі Івашынай знаходзіцца за кратамі гарадзенскай турмы з сакавіка 2021 года, калі яго затрымалі супрацоўнікі КДБ. Апошнія чатыры месяцы жонка і маці Дзяніса не атрымліваюць ад яго лістоў.