21 траўня ў Беластоку ў сядзібе Беларускага Радыё Рацыя прайша сустрэча памяці Вітольда Ашурка, якую арганізавалі беларускія праваабаронцы. Былі ўспаміны тых, хто ведаў Вітольда, гучалі песні і вершы, развагі пра рэчаіснасць і лёс беларускай нацыі. Была зладжана таксама невялікая выстава паштовак і лістоў палітвязняў.
Выступілі Уладзімір Хільмановіч, Алесь Капуцкі, Яўген Вапа, Сяргей Верамеенка, Вольга Івашына. На сустрэчу памяці Ашурка прыйшлі журналісты, прадстаўнікі беларускай дыяспары, а таксама карэнныя беларусы.
Вітольду Ашурку
Ты крочыў дарогай Годных,
не ведаў шляхоў крывых…
Жывыя глядзяць на мёртвых,
а мёртвыя – на жывых…
Шануючы іх Магілы,
узняўшы Крыжы ў палях,
ты так набіраўся сілы
прайсці свой геройскі шлях!
І смела наперад крочыў,
узняўшы да Неба Сцяг,
Айчыне Святло прарочыў,
Народу – свабодны шлях!
Абралі цябе Нябёсы,
каб так ты жыццё пражыў,
што змог павязаць ім лёсы,
што прыйдуць, і тых, хто быў…
Зляцеў твой апошні подых
жыцця дарагога міг…
Цяпер сярод Нашых Мёртвых
глядзіш ты на нас жывых…
(верш Віктара Сазонава, напісаны год таму пасля гібелі Вітольда Ашурка)
У другой частцы сустрэчы адбылося падпісанне паштовак цяперашнім палітвязням, тым людзям, якія пакутуюць за кратамі ў Беларусі.
Гарадзенская праваабарона 