У Гарадзенскім абласным судзе абвяшчаюць прысуды жыхарам вобласці, затрыманым па «справе Зельцара». Як правіла, прысуджаюць па некалькі гадоў калоніі. Абвінавачаныя чакаюць суду пад вартай ужо 10 месяцаў.

Гарадзенцаў затрымлівалі за каментары на адрас супрацоўніка КДБ Дзмітрыя Федасюка, які загінуў падчас спробы затрымаць айцішніка Андрэя Зельцара. У канцы верасня 2021 затрыманні прайшлі па ўсёй Беларусі – выявілі больш за 200 аўтараў абразлівых каментароў. Праваабаронцы прызналі затрыманых па «справе Зельцара» палітвязнямі.

Крымінальныя справы распачалі паводле арт. 369 «Абраза прадстаўніка ўлады» або арт. 130 «Распальванне расавай, нацыянальнай, рэлігійнай альбо іншай сацыяльнай варожасці або варажнечы».

Прысуды

Палітвязня Аляксандра Пятрашку асудзілі на паўтара года калоніі агульнага рэжыму. Суддзя Гарадзенскага абласнога суда Васіль Скок прызнаў яго вінаватым па арт. 130 КК «Распальванне сацыяльнай варожасці або варажнечы» і арт. 369 КК «Абраза прадстаўніка ўлады». Вядома, што Аляксандра змусілі прызнаць віну.

46-гадовай Аксане Каспяровіч абвесцілі прысуд па «справе Зельцара» 29 чэрвеня — 1 год і 2 месяцы пазбаўлення волі па ч.1 арт. 130 — Распальванне расавай, нацыянальнай, рэлігійнай альбо іншай сацыяльнай варожасці або варожасці. Паколькі адзін дзень у СІЗА залічваецца за паўтара дня ў калоніі, Каспяровіч выйдзе на волю праз некалькі тыдняў, палічыў Telegram-канал «Суды, задержания в Лиде».

Раней па «справе Зельцара» выносілі прысуды ад 1,5 гадоў «хатняй хіміі» да 3 гадоў калоніі.

Судзілі і за экстрэмізм

Жыхара Наваградскага раёна ў лютым асудзілі на тры гады калоніі за «садзейнічанне экстрэмісцкай дзейнасці» паводле ч.1 арт. 361−4 КК. Верагодна, гаворка ідзе аб «справе Зельцара». 38-гадовы жыхар Навагрудскага раёна К. 3 кастрычніка 2021 года апублікаваў каментар у адным з Telegram-чатаў. Каментар «падахвочвае іншых грамадзян да здзяйснення супрацьпраўных гвалтоўных дзеянняў, у тым ліку з выкарыстаннем зброі», лічаць у пракуратуры.

Збіццё і спіс «тэрарыстаў»

Паводле інфармацыі Hrodna.life, некаторых пры затрыманні збівалі. У жодзінскай турме № 8 з моманту пераводу затрыманых за каментары па «справе Зельцара» абвясцілі каранцін, з-за якога вязняў абмежавалі ва ўсім. Праз паўтара месяца каранцін знялі. Гэтыя паўтара месяца затрыманыя сядзелі ў тым адзенні, у якім іх затрымалі, без сродкаў гігіены і цёплых рэчаў.

Некаторых фігурантаў «справы Зельцара» ўнеслі ў пералік асоб, якія маюць дачыненне да тэрарыстычнай дзейнасці. Гэта Андрэй Кандратовіч, Аляксандр Пятрашка, Аксана Каспяровіч, Аляксандр Гаўрылік, Аляксей Сянько.

Хто яшчэ затрыманы?

Па «справе Зельцара» затрыманыя не менш за восем жыхароў вобласці. Гэта шэсць гарадзенцаў:

  • Бяленік Павел Тадэвушэвіч,
  • Грыг Рыгор Вітольдавіч,
  • Кандратовіч Андрэй Аляксандравіч (пачаўся судовы працэс — Hrodna.life),
  • Курганскі Аляксандр Сяргеевіч,
  • Пятрашка Аляксандр Аляксандравіч,
  • Філіпаў Канстанцін Станіслававіч.

Таксама затрыманыя Аляксандр Гаўрылік (пачаўся судовы працэс) з Бераставіцы, Аляксей Сянько са Слоніма, Іна Антонавіч і Аксана Каспяровіч.