Праводзіць экскурсіі ў музеях змогуць толькі ўласныя экскурсаводы, а культурна-відовішчныя мерапрыемствы дазволяць ладзіць толькі тым, у каго будзе пасведчанне. Адпаведныя змены ў Кодэкс аб культуры 25 ліпеня 2022 года падпісаў Лукашэнка.

Што будзе новага ў Кодэксе аб культуры:

  • Уводзяць пасведчанне на права арганізацыі і правядзенне культурна-відовішчных мерапрыемстваў усімі арганізатарамі. Гэта не тычыцца фізічных асоб, якія праводзяць мерапрыемствы без асабістых патрэбаў і без атрымання прыбытку. Да гэтага можна залічыць юбілеі і вяселлі.
  • Міністэрства культуры будзе запісваць арганізатараў культурна-відовішчных мерапрыемстаў у адпаведны рэестр. Правесці мерапрыемства будзе магчыма толькі асобам, якія ёсць у гэтым рэестры.
  • Прыярытэтнае права на набыццё культурных каштоўнасцяў, калі ўласнік прыме рашэнне аб іх адчужэнні, будуць мець дзяржаўныя арганізацыі культуры.
  • Пераразмеркавалі паўнамоцтвы паміж Міністэрствам культуры і мясцовымі органамі ўлады па пытаннях выкарыстання нерухомых матэрыяльных гісторыка-культурных каштоўнасцяў рэгіянальнага значання. Спрасцілі парадак правядзення на іх бягучага рамонту.
  • У законе змяшчаюцца таксама іншыя нормы, у тым ліку ўдакладненні асобных аспектаў у сферах бібліятэчнай, музейнай, рамесніцкай дзейнасці, кінематаграфіі, народнай творчасці.
  • Праводзіць экскурсіі ў музеях будзе дазволена толькі супрацоўнікам музеяў.

Змены ў Кодэксе набудуць моц праз шэсць месяцаў пасля афіцыйнага апублікавання.