Яшчэ два карныя палітычныя працэсы па крымінальных справах пачынаюцца 9 лютага ў Лідзе.

У будынку Лідскага раённага суду Уладзімір Федаровіч будзе судзіць Сцяпана Якуця. 46-гадовы Якуць быў затрыманы яшчэ 18 кастрычніка 2022 году. На відэа, якое апублікавалі праўладныя тэлеграм-каналы, мужчына кажа, што быў затрыманы за распаўсюд экстрэмісцкіх матэрыялаў і абразу супрацоўнікаў міліцыі ў інтэрнэце.

Фігуруюць наступныя артыкулы Крымінальнага Кодэксу:

ч. 1 арт. 342 (Актыўны ўдзел у дзеяннях, якія груба парушаюць грамадскі парадак),

ч. 1 арт. 368 (Абраза Лукашэнкі),

ч. 2 арт. 367 (Паклёп у дачыненні Лукашэнкі),

арт. 369 (Абраза прадстаўніка ўлады).

Працэс пачнецца а 15-й гадзіне.

У гэты ж дзень суддзя Аляксандр Мішуроў пачне працэс у дачыненні да іншага лідзяніна – Ільі Мазоля.

Ілья Мазоль абвінавачваецца па адным артыкуле Крымінальнага кодэксу:

ч. 1 арт. 342 (Актыўны ўдзел у дзеяннях, якія груба парушаюць грамадскі парадак).

Пачатак працэсу прызначаны на 14.30

Аляксандр Мішуроў вядомы тым, што ў снежні 2022 году прысудзіў лідзяніну Андрэю Красніку тэрмін тры гады і 6 месяцаў з адбываннем у папраўчай калоніі ва ўмовах ўзмоцненага рэжыму, у верасні таго ж году прысудзіў Валерыю Тумілевічу паўтара года калоніі за абразу Лукашэнкі, а яшчэ раней – у траўні таго ж году дадаткова засудзіў 23-гадовага палітвязня Арцёма Касакоўскага да яшчэ паўтара году зняволення.