ілюстрацыйнае фота

У гарадзенскім філіяле адукацыйнага цэнтра «100 балаў» прайшлі ператрусы. Цэнтр абвінавачваюць у нясплаце падаткаў і страхавых узносаў. Яго заснавальнікі былі затрыманыя раней паводле палітычнага артыкулу.

Цэнтр «100 балаў» працаваў у Гародні на вуліцы Маставая, 31. Як школа ён не працаваў з 1 верасня 2022, трапіўшы пад хвалю рэпрэсій у дачыненні да прыватных школ.

Цяпер арыштаваная маёмасць”100 балаў” практычна ва ўсіх абласных цэнтрах і рэгіянальных гарадах, дзе размяшчаліся офісы, расказаў намеснік начальніка ўпраўлення Дэпартамента фінансавых расследаванняў Камітэта дзяржкантролю Віцебскай вобласці Арцём Дунько. Усяго правялі 23 ператрусы.

Цэнтр «100 балаў» працягваў функцыянаваць як рэпетытарскі і супрацаваў з настаўнікамі. Большасць з іх (180 чалавек) рэгістравалі ў рэпетытарскіх цэнтрах як індывідуальных прадпрымальнікаў для мінімізацыі падаткаў, хоць па факце педагогі з’яўляліся іх работнікамі, сцвярджае цяпер Камітэт дзяржкантролю. «100 балаў» падавалі класы для заняткаў, прымалі ад бацькоў заявы, вызначалі кошт паслуг, складалі расклад. За атрыманыя паслугі бацькі плацілі на адрас рэпетытарскіх цэнтраў. З чэрвеня 2021 года паступіла 14,5 млн. рублёў. Пасля 50% атрыманых сродкаў пералічвалі на адрас ІП па дагаворах аказання паслуг.

Цянам 10 гадоў цэнтры не выплачвалі падаходны падатак з даходаў ІП і ўнёскі ў ФСАН на суму больш за 3,6 мільёна рублёў, сцвярджаюць у КДК. Па звестках ведамства, схема выплаты заработнай платы ў канвертах была па ўсёй рэспубліцы ў больш за 186 суб’ектах. З нанесенай шкоды пагашана 630 тысяч. Усе падазраваныя супрацуюць са следствам, адзначыў прадстаўнік КДК. Пачата шэсць крымінальных спраў.

Рэпетытарскія цэнтры з 2012 года працавалі ў Менску, Віцебску, Гародні, Магілёве, Полацку, Оршы і Баранавічах.

Заснавальнікі цэнтра Яўген Лівянт і Аляксей Іваноў ужо праходзяць абвінавачанымі па «народным» артыкуле Крымінальнага кодэкса 342 («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх»). Іх утрымліваюць пад вартай.

Пра затрыманне Лівянта стала вядома ў канцы снежня 2022 года. У пачатку 2023 паведамілі і пра затрыманне яго сям’і: жонкі, дачкі і зяця.

hrodna.life