Так званы „рэспубліканскі суботнік” пройдзе ў Беларусі 22 красавіка, згодна з пастановай прэмʼер-міністра РБ Рамана Галоўчанкі. 22 красавіка – якраз дзень нараджэння правадыра сусветнага пралетарыяту Леніна, “традыцыі” якога так зацята адраджае рэжым, што сёння пануе ў Беларусі.

Грашовыя сродкі, заробленыя ў дзень суботніка, у тым ліку на працоўных месцах, пойдуць у два месцы. Палова — Гомельскаму аблвыканкаму на рэканструкцыю мемарыяльнага комплекса вязням Азарыцкага лагера смерці (Калінкавіцкі раён Гомельскай вобласці). Другая палова — Берасцейскаму аблвыканкаму на стварэнне Рэспубліканскага цэнтра патрыятычнага выхавання моладзі. Пра гэты цэнтр на базе Кобрынскага ўмацавання Брэсцкай крэпасці стала вядома год таму. Гэта мае быць сумесны з расейцамі праект.