У Менскім гарадскім судзе 21 красавіка адбыўся разгляд апеляцыйных скаргаў і пракурорскага пратэсту на прысуд па справе “Вясны” суду Ленінскага раёну Менску ад 3 сакавіка, якім тром палітзняволеным праваабаронцам Алесю Бяляцкаму, Валянціну Стэфановічу і Уладзіміру Лабковічу прызначаны жорсткія тэрміны – ад 7 да 10 гадоў калоніі. Судовая калегія пад старшынствам Святланы Бандарэнкі пакінула скаргі вясноўцаў і іх абаронцаў без задавальнення, а пратэст пракурора, які прасіў змяніць фармулёўку прысуда, задаволіла.

21 красавіка прысуд у дачыненні да палітзняволеных праваабаронцаў “Вясны” увайшоў у сілу – хутка іх этапуюць у калоніі.

Пракурор прынёс пратэст, а палітзняволеныя праваабаронцы абскардзілі прысуд. Суд па іх разглядзе прызначылі менш, чым за два месяцы. 

На судзе стала вядома, што Кароль прасіў змяніць прысуд у частцы прызначэння тэрміну толькі Уладзіміру Лабковічу. На яго думку, прызначэнне Лабковічу пакарання ў выглядзе шасці гадоў пазбаўлення волі паводле ч. 4 арт. 228 Крымінальнага кодэкса з’яўляецца няслушным, бо па ім можа быць прызначана пакаранне ад 7 да 12 гадоў. Пракурор настойваў, што суд не выявіў прычын для прызначэння Лабковічу тэрміну ніжэй ніжняй мяжы, прадугледжанага Крымінальным кодэксам. Таму Кароль у сваім пратэсце мяркуе неабходным прызначыць Лабковічу пакаранне паводле часткі 4 артыкула 228 Крымінальнага кодэкса у выглядзе сямі гадоў пазбаўлення волі. Выніковы тэрмін Уладзіміру Лабковічу, на думку дзяржабвінаваўцы, павінны застацца ранейшым – сем гадоў пазбаўлення волі. Судовая калегія з ім пагадзілася і задаволіла пратэст.

Алеляцыйныя скаргі вясноўцаў і іх абаронцаў пакінуты без задавальнення.

21 красавіка прысуд у адносінах да палітзняволеных праваабаронцаў увайшоў у сілу – хутка іх этапуюць у калоніі. 

spring96.org