У Беластоку ўвечары 24 лістапада каля помніка Ежы Папялушку прайшла чарговая акцыя салідарнасці на знак падтрымкі Анджэя Пачобута і іншых палітвязняў, якія зняволеныя ў турмах Беларусі. На акцыю прыйшло каля 40 грамадскіх актывістаў і журналістаў. Выступалі прадстаўнікі беларускай і польскай грамадзянскай супольнасці, многія з якіх былі змушаныя пакінуць Беларусь з-за пераследу.

На акцыі ўзгадвалі найперш пра Анджэя Пачобута, ужо больш двух тыдняў ад яго няма ніякай інфармацыі, таму цяжка ацаніць сітуацыю са здароўем і ўмовамі ўтрымання журналіста і дзеяча польскай супольнасці ў Беларусі. Ясна толькі, што яны блізкія да катавальных, як і ў многіх іншых палітвязняў.

Анджэй Пачобут ужо 32 месяцы знаходзіцца ў зняволенні. Штомесяц у Беластоку праходзяць акцыі салідарнасці. Нагадаем, што Пачобута засудзілі да 8 гадоў калоніі паводле арт. 361 КК (заклікі да дзеянняў, накіраваных на прычыненне шкоды нацбяспецы Рэспублікі Беларусь) і арт. 130 КК (распальванне варожасці).

bsh