Прапануем вашай увазе краязнаўчы рэгіянальны каляндар на люты 2024 году.

1 лютага

150 гадоў таму (1874) – У мяст. Луна (Мастоўскі р-н) нарадзіўся Кастусь Бялецкі, беларускі грамадзка-палітычны дзеяч.

2 лютага

Сусьветны дзень водна-балотных нетраў.

435 гадоў таму (1589) – Кароль Жыгімонт ІІІ пацьвердзіў Гародні ўсе прывілеі.

105 гадоў таму (1919) – У Гародні выйшаў першы нумар газеты “Беларускі народ”, выдаванай Міністэрствам беларускіх спраў.

3 лютага

60 гадоў таму (1964) – У Вільні памёр Станіслаў Станкевіч (нар. у 1886 г. у в. Арляняты, Смургонскі р-н), беларускі паэт, кнігавыдавец.

4 лютага

130 гадоў таму (1894) – У Гародні нарадзіўся Ян Каханоўскі, грамадзкі дзеяч, настаўнік гарадзенскай гімназіі, стваральнік гарадзенскага заапарку. Чалавек, які ахвяраваў сваім жыцьцём за іншага.

130 гадоў таму (1894) – У фальв. Крыстынопаль (Вялейскі р-н) памёр Адам Гурыновіч, беларускі паэт, фальклярыст. Пахаваны на Крыстынопальскіх могілках (цяпер могілкі суседняй вёскі Золькі).

90 гадоў таму (1934) – У в. Вётхава (Смаргонскі р-н) нарадзіўся Арсень Ліс, беларускі літаратуразнавец, фальклярыст, культуролаг.

8 лютага

115 гадоў таму (1909) – У гарах Татры ў выніку сыходу лавіны загінуў Мечыслаў Карловіч, кампазітар, дырыжор, сын мовазнаўца і этнографа Яна Карловіча. Нараджэнец в. Вішнева (Смургонскі р-н).

110 гадоў таму (1914) – У Баранавічах нарадзіўся Валянцін Таўлай, паэт, дзеяч заходнебеларускага руху.

10 гадоў таму (2014) – У Лідзе з нагоды 100-ых угодкаў літаратара на доме па вуліцы Замкавая-7 адкрыта мемарыяльная дошка Валянціну Таўлаю.

9 лютага

25 гадоў таму (1999) – У в. Валеўка (Наваградзкі р-н) памёр Уладзімір Урбановіч, беларускі краязнавец, педагог, культуролаг. Пахаваны ў Валеўцы.

10 лютага

115 гадоў таму (1909) – У Львове (Украіна) памёр Эдвард Паўловіч, мастак, асьветнік, удзельнік паўстаньня 1863-64 гг., мемуарыст. Вучыўся ў Жыровічах і Слоніме. Пахаваны на Лычакоўскіх могілках.

30 гадоў таму (1994) – У Гародні пасьля зьбіцьця невядомымі памёр Антон Сьцяпура, дзеяч беларускага руху, сябра БНФ. Нараджэнец в. Занюкі (Шчучынскі р-н). Пахаваны на могілках па прасьп. Касманаўтаў.

11 лютага

45 гадоў таму (1979) – У Нью-Ёрку памёр Мікола Гарошка, дзеяч эміграцыі (ЗША), першы старшыня БАЗА. Нараджэнец в. Трашчыцы (Карэліцкі р-н).

12 лютага

Міжнародны дзень навукі і гуманізму альбо Дзень Дарвіна

225 гадоў таму (1799) – У Наваградку ў Фарным касьцёле ахрышчаны Адам Міцкевіч.

13 лютага

Сусьветны дзень радыё

105 гадоў таму (1919) – У Гародні памёр Аляксандар Грыкоўскі (нар. у 1893 г. у в. Корніна, Беласточчына), беларускі грамадзкі дзеяч, педагог. У 1916 г. скончыў Сьвіслацкую настаўніцкую гімназію, жыў і працаваў у Гародні.

50 гадоў таму (1974) – У Будславе (Мядзельскі р-н) памерла Паўліна Мядзёлка, акторка, дзяячка беларускай культуры. Часта бывала ў Гародні. Пахавана ў Будславе на старых каталіцкіх могілках.

40 гадоў таму (1984) – У Інавроцлаве (Польшча) памёр Язэп Найдзюк (Александровіч), дзеяч заходнебеларускага вызвольнага руху, выдавец, гісторык. Нараджэнец в. Бойдаты (Ваўкавыскі р-н).

15 гадоў таму (2009) – У Менску памёр Валянцін Тарас, беларускі паэт, публіцыст, перакладнік. У 1944-48 гг. жыў і працаваў у Гародні.

15 лютага

20 гадоў таму (2004) – У Менску ў шпіталі памёр Аляксандар Міхальчык, грамадзка-палітычны актывіст, старшыня Гарадзенскай гарадзкой арганізацыі партыі БНФ. Пахаваны ў Гародні на могілках па прасп. Касманаўтаў.

19 лютага

45 гадоў таму (1979) – У Зэльве памёр Янка Геніюш, беларускі дзеяч, бібліяфіл, доктар, вязень ГУЛАГу. Пахаваны ў Зэльве.

20 лютага

Сусьветны дзень сацыяльнай справядлівасці

135 гадоў таму (1889) – У в. Балотца (Наваградзкі р-н) нарадзіўся Фёдар Турук, беларускі грамадзка-культурны дзеяч, гісторык, педагог.

21 лютага

Міжнародны дзень роднай мовы.

22 лютага

Міжнародны дзень падтрымкі ахвяраў злачынстваў

24 лютага

445 гадоў таму (1579) – Мястэчка Мір атрымала Магдэбургскае права.

65 гадоў таму (1959) – Адчынены Лідзкі краязнаўчы музей.

25 лютага

115 гадоў таму (1909) – У Слоніме нарадзіўся Сяргей Дарожны (сапр. Серада), беларускі пісьменьнік, перакладнік.

26 лютага

90 гадоў таму (1934) – У в. Збляны (Лідзкі р-н) нарадзіўся Аляксей Логвін, адзін з ствараньнікаў моладзевай падпольнай антысталінскай арганізацыі, вязень ГУЛАГу.

27 лютага

105 гадоў таму (1919) – Створана Літоўска-Беларуская ССР з сталіцай у Вільні.

105 гадоў таму (1919) – У Гародні прайшлі выбары ў гарадзкую раду. З 36 абраных радных 22 былі габрэі.

5 гадоў таму (2019) – Памёр Уладзімір Анцулевіч, беларускі фізік, грамадска-палітычны дзеяч, педагог. Нараджэнец в. Жытомля (Гарадзенскі р-н).