Прапануем вашай увазе краязнаўчы рэгіянальны каляндар на сакавік 2024 году.

3 сакавіка

Сусьветны дзень пісьменьніка

15 гадоў таму (2009) – У г. Гораў Вялікапольскі, Польшча), памёр Вітольд Карпыза, польскі краязнавец, дасьледнік гістарычнай Ваўкавышчыны. Нараджэнец в. Зіняўцы (Ваўкавыскі р-н).

4 сакавіка

540 гадоў таму (1484) – У Гародні памёр Казімір, сын вялікага князя ВКЛ Казіміра IV Ягелончыка, патрон Гарадзенскага біскупства. Пахаваны ў віленскім катэдральным саборы (капліца Сьв. Казіміра). Кананізаваны ў 1521. Дзень Сьвятога Казіміра.

150 гадоў таму (1874) – У в. Вётхава (Смаргонскі р-н) нарадзіўся Павел Южык, беларускі мастак, педагог.

20 гадоў таму (2004) – У Вэльпэне пад Парыжам памёр Міхась Навумовіч, дзеяч беларускай эміграцыі (Францыя), сябра Рады БНР. Нараджэнец Наваградчыны.

6 сакавіка

25 гадоў таму (1999) – У Вільні памёр Міхаіл Петрыкевіч, беларускі краязнавец, музеязнавец, педагог. Нараджэнец в. Падкасоўе (Наваградзкі р-н). Пахаваны на могілках Карвялішкес ля Вільні.

8 сакавіка

210 гадоў таму (1814) – Памёр Юзаф Несялоўскі (нар. у 1728 г.), апошні наваградзкі ваявода, удзельнік паўстаньня 1794. Меў родавы маёнтак у Варончы, пахаваны ў крыпце мясцовага касьцёлу.

35 гадоў таму (1989) – Памёр Мікола Ягаўдзік, беларускі вайсковец, дзеяч беларускай эміграцыі (Бельгія, ЗША). Нараджэнец Слонімшчыны.

9 сакавіка

365 гадоў таму (1659) – Маскоўскі гарнізон у Гародні разам з ваяводам здаўся войску гетмана Паўла Сапегі.

10 сакавіка

135 гадоў таму (1889) – У Гародні нарадзіўся Уладзімір Пігулеўскі, беларускі грамадзкі дзеяч, пісьменьнік.

60 гадоў таму (1964) – У Рэплі (Ваўкавыскі р-н) памёр Юльян Бароўка, беларускі рымска-каталіцкі сьвятар, працаваў у Гародні, у 1923 г. служыў у Барунах, з 1937 г. у Рэплі.

12 сакавіка

135 гадоў таму (1889) – У Гаркавічах (Сакольскі пав., Беласточчына) нарадзіўся Аляксей Кішкель, беларускі педагог, выкладнік Клецкай беларускай гімназіі. Жыў і працаваў у Квасоўцы і Гародні. Памёр у 1969 г. у Гародні, пахаваны на Занёманскіх могілках.

13 сакавіка

90 гадоў таму (1934) – У в. Стральцы (Гарадзенскі р-н) нарадзілася Аўгіньня Кавалюк, паэтка, перакладчыца. Жыла і працавала ў Латвіі, Санкт-Пецярбургу.

15 сакавіка

Дзень Канстытуцыі Рэспублікі Беларусь

135 гадоў таму (1889) – На Віленшчыне нарадзіўся Павал Пякарскі, беларускі каталіцкі сьвятар. У 1925-32 гг. служыў пробашчам у Жупранах, быў кіраўніком Ашмянскага дэканату.

30 гадоў таму (1994) – У Менску на 13-й сесіі Вярхоўнага Савета 12-га скліканьня была прынятая Канстытуцыя Рэспублікі Беларусь.

16 сакавіка

105 гадоў таму (1919) – У Гародні выйшаў першы нумар газэты “Бацькаўшчына” (выдавалася да 28 сак.).

80 гадоў таму (1944) – У в. Вётхава (Смаргонскі р-н) памёр Павел Южык, беларускі мастак, педагог.

17 сакавіка

25 гадоў таму (1999) – У Менску памёр Міхась Біч, беларускі гісторык. Нараджэнец в. Мілявічы (Мастоўскі р-н).

18 сакавіка

130 гадоў таму (1894) – У в. Барані (Астравецкі р-н) нарадзіўся Альбін Стаповіч, беларускі грамадзка-культурны дзеяч, кампазітар, музычны педагог, публіцыст.

40 гадоў таму (1984) – У Слоніме памёр Іосіф Вількоўскі (Язэп Вількоўшчык), беларускі паэт і публіцыст. Пахаваны ў Слоніме.

19 сакавіка

425 гадоў таму (1599) – У г. Пасаў (Германія) памёр Станіслаў Радзівіл, дзяржаўны дзеяч ВКЛ. Валодаў Нягневічамі ў Наваградзкім пав.

50 гадоў таму (1974) – У Солах (Смургонскі р-н) памёр Эдуард Сташкевіч, удзельнік беларускага антыкамуністычнага падпольнага вучнёўскага руху ў Смургонях у 1949-50 гг. Пахаваны ў Солах.

20 сакавіка

215 гадоў таму (1809) – У Гародні памерла Саламея Дэшнер (нар. у Беластоку ў 1759 г.), тэатральная акторка. З 1794 г. жыла ў Гародні, дзе ў 1802 г. стварыла першы пастаянны тэатр, якім кіравала да канца жыцьця.

21 сакавіка

Сусьветны дзень паэзіі

Міжнародны дзень лясоў

175 гадоў таму (1849) – У Вільні ў турме, засуджаны да 20 гадоў катаргі за перавоз нелегальнай літаратуры, памёр Аляксандар Незабытоўскі, беларуска-польскі пісьменьнік, філосаф, гісторык. Нараджэнец Наваградчыны.

10 гадоў таму (2014) – Памёр Анатоль Кулеш, беларускі краязнавец, географ.

22 сакавіка

Сусьветны дзень водных рэсурсаў

160 гадоў таму (1864) – У Вільні на Лукіскім пляцы павешаны Кастусь Каліноўскі, кіраўнік нацыянальна-вызвольнага паўстаньня. Магіла была паблізу сёньняшняй вежы Гедыміна. Перапахаваны ў ліку іншых у капліцы на могілках Росы.

23 сакавіка

125 гадоў таму (1899) – У Жалудку (Шчучынскі р-н) нарадзілася Вольга Галіна (дзявочае Грудзінская, па мужу Александроўская), беларуская акторка, педагог.

100 гадоў таму (1924) – У в. Яманты (Лідзкі р-н) нарадзіўся Сяргей Карабач, беларускі грамадзкі актывіст Таварыства Беларускай Культуры ў Вільні, лекар.

24 сакавіка

230 гадоў таму (1794) – Пачалося вызвольнае паўстаньне на чале з Тадэвушам Касьцюшкам.

25 сакавіка

Абвяшчэньне Трэцяй устаўной граматы Беларускай Народнай Рэспублікі. Дзень Волі.

27 сакавіка

Сусьветны дзень тэатра

125 гадоў таму (1899) – У в. Малая Бераставіца (Бераставіцкі р-н) нарадзіўся Аляксей Васіленя, грамадзка-палітычны дзеяч, у другую сусьветную вайну кіраўнік Беларускай Народнай Самапомачы ў Слоніме, дзеяч беларускай эміграцыі (Нямеччына, Аўстралія).

31 сакавіка

Вялікдзень па календары каталіцкай канфесіі