Беларусы, якія ездзяць за мяжу, сведчаць, што службоўцы ў цывільным працягваюць выбарачна «выцягваць» падарожнікаў з чаргі на пашпартным кантролі і чыніць допыты з правяраннем тэлефона. «Кіберпартызаны» на просьбу «Белсату» далі парады, што варта зрабіць пасля такога «правярання».

Пры ўездзе ў Беларусь работнікі спецслужбаў забіраюць на допыт усіх грамадзянаў Украіны. Як пішуць падарожнікі ў Telegram-чатах, прысвечаных мінанню мяжы, праз гэта аўтобус можа затрымацца на мяжы і на некалькі гадзінаў:

«Усіх, у каго ўкраінскі пашпарт, выклікаюць да допыт. Цягнецца даўгавата, а ўвесь аўтобус чакае. Маюць быць важкія падставы паездкі ў Беларусь. Калі едзеце да сваякоў, спытаюць адрас, нумар тэлефона».

Беларусаў забіраюць выбарачна, і, паводле сведчанняў, найбольшую ўвагу прыцягваюць тыя, хто даўно не быў на радзіме:

«Задавалі розныя (вельмі прыватныя) пытанні, правяралі тэлефон, капаліся ў фотагалерэі, перапісках. Чатыры асобы знялі з нашага аўтобуса, адну забрала міліцыя».

«Муж сястры паўтара гады не быў, завялі на допыт».

«Дзяўчыну з картаю паляка забралі на допыт на гадзіну».

«2,5 гадзіны чакалі ўкраінцаў, усіх забралі на допыт з тэлефонамі, але без асабістых рэчаў».

Падчас адной такой размовы, як стала вядома «Белсату», сілавік паклаў на стол смартфон «ахвяры», побач ляжаў яшчэ адзін тэлефон, імаверна, службовы, і работнік працаваў з абодвума апаратамі, штосьці націскаючы і гледзячы.

Як папярэдзілі «Кіберпартызаны», такое «правяранне» можа прывесці да небяспечных наступстваў. «Сілавікі могуць шмат чаго зрабіць у гэты момант», – адзначылі адмыслоўцы ў размове з «Белсатам»:

  • зайсці ў вашыя мэсэнджары, сацсеткі, паштовыя акаўнты на сваім тэлефоне;
  • пабачыць нумар IMEI тэлефона;
  • скапіяваць сабе вашыя фота і відэа;
  • усталяваць вам якую-кольвек праграму.

Пасля такога допыту з корпаннем у тэлефоне варта паклапаціцца пра бяспеку. Вось агульныя парады ад «Кібепартызанаў»:

  • спраўдзіць усе сацсеткі, мэсэнджары, паштовыя акаўнты – ці ёсць падазроныя ўваходы, усе староннія сесіі патрэбна выдаліць;
  • прагледзець пералік усталяваных праграмаў, выдаліць падазроныя;
  • на скрайні выпадак, калі ўпэўненасці ў бяспецы няма, – скінуць тэлефон да заводскіх наладаў.

Трэба памятаць, што «абнуленне» смартфона прывядзе да выдалення кантактаў (калі яны не сінхранізаваныя з воблакам або не захаваныя на SIM-картцы), SMS-паведамленняў, гісторыі званкоў, праграмаў, усіх файлаў – фота, відэа, дакументаў. Перад гэтым варта скапіяваць неабходнае, каб не страціць.

Раней «Белсат» падрыхтаваў інструкцыю з парадамі, як падрыхтавацца для дагляду тэлефона на мяжы. Усю палітычную актыўнасць у інтэрнэце давядзецца хаваць уручную: : перабіраць свае падпіскі ў Telegram, пасты ў Facebook, перапіскі ў Facebook Messanger, гісторыі ў Instagram, лайкі ў TikTok, прагляды відэа на Youtube, радкі пошуку і гэтак далей.