Суд Ленінскага раёна Гародні ўдарна папрацаваў, прызнаўшы экстрэмісцкімі папулярны ў горадзе бізнэс-партал Grodno.in і ўсе сацсеткі, з ім звязаныя, а таксама шэраг іншых інтэрнэт-рэсурсаў.

Акрамя ўласна сайта Grodno.in, «экстрэмісцкімі» прызналі два звязаных з ім тэлеграм-каналы, а таксама старонкі ў тыктоку, інстаграме, фэйсбуку, X, «Укантакце» і «Аднакласніках».

Раней Grodno.in уступіў у канфлікт з вядомай гродзенскай даносчыцай Вольгай Бондаравай, адносна якога яна ў сваім тэлеграм-канале рабіла закіды, называючы яго «экстрэмісцкім», хоць такога статуса выданне тады не мела. Журналісты падавалі на Бондараву ў суд, але справа да яго тады не дайшла — бакі дамовіліся праз медыятара. Даносчыцы прыйшлося публічна абвяргаць адзін са сваіх пастоў.

Цяпер жа, праз больш чым паўгода пасля таго выпадку, гэты статус выданне «дагнаў», і Бондарава з гэтага ўжо цешыцца, не хаваючы, што сама прыклала да гэтага руку. 

Таксама пад забарону трапіў акаўнт у інстаграме пад назвай autapolk. 

А суд Лідскага раёну тым часам прызнаў экстрэмісцкім тыкток-акаўнт denroy86 Дзяніса Чашчэвіка.

наша ніва