Вашай увазе каляндар круглых і юбілейных датаў Гарадзеншчыны на красавік 2025 году.

1 красавіка

Міжнародны дзень жартаў.

Міжнародны дзень птушак.

2 красавіка

Міжнародны дзень дзіцячай кнігі.

6 красавіка

120 гадоў таму (1905) – У Кіеве памёр Іосіф Баранецкі, прыродазнавец і педагог, які нарадзіўся на Гарадзеншчыне ў 1843 г.

115 гадоў таму (1910) – У Пецярбургу нарадзіўся Барыс Кіт, беларускі навуковец, дзеяч эміграцыі (ЗША, Нямеччына). Бацька паходзіў зь вёскі Агароднікі (Карэліцкі р-н).

7 красавіка

Сусьветны дзень здароўя.

615 гадоў таму (1410) – У Кежмарку (цяпер Славаччына) крыжакі зьдзесьнілі спробу забойства князя Вітаўта.

165 гадоў таму (1860) – У Вільні памёр Караль Падчашынскі, асьветнік, архітэктар, дасьледнік, педагог. Быў пахаваны на віленскіх могілках Росы, магіла не захавалася. Нараджэнец в. Жырмуны (Вараноўскі р-н).

9 красавіка

165 гадоў таму (1860) – Нарадзіўся Вільгельм Краеўскі, арганізатар шкляной вытворчасьці на Лідчыне.

10 красавіка

390 гадоў таму (1635) – Памёр Ян Станіслаў Сапега, сын Льва Сапегі, дзяржаўны дзеяч ВКЛ. Фундаваў у Слоніме кляштар францішканцаў, касьцёл канонікаў рэгулярных. Валодаў маёнткамі Зэльва, Івашкавічы (Зэльвенскі р-н), Азярніца (Слонімскі р-н).

25 гадоў таму (2000) – У Гародні створаны габрэйскі культурна-асьветніцкі дом “Менора”.

11 красавіка

Міжнародны дзень вызваленьня вязьняў фашыстоўскіх канцлагераў.

12 красавіка

135 гадоў таму (1890) – У в. Шчорсы (Наваградзкі р-н) нарадзіўся Янка Нёманскі (сапр. Іван Пятровіч), беларускі пісьменьнік, эканаміст.

13 красавіка

85 гадоў таму (1940) – Дэпартацыя з тэрыторыі Заходняй Беларусі сем’яў рэпрасаваных і асоб, якія ўцяклі за мяжу. 24 тысячы чалавек гвалтоўна вывезены ў Сібір і Казахстан.

14 красавіка

190 гадоў таму (1835) – У в. Сянно (Наваградзкі р-н) нарадзіўся Валер’ян Вільчэўскі, лекар, удзельнік паўстаньня 1863-64 гг. у атрадзе Францішка Юндзіла ў Слонімскім пав.

140 гадоў таму (1885) – У в. Максімаўка (Маладэчанскі р-н) нарадзіўся Сымон Рак-Міхайлоўскі, беларускі грамадзка-палітычны дзеяч, сябра Рады БНР, публіцыст. Заснаваньнік і дырэктар настаўніцкай семінарыі ў Барунах (у 1920-22 гг.). У 1918-20 гг. настаўнічаў у Гародні.

105 гадоў таму (1920) – У в. Страшава (Беласточчына) нарадзіўся Аляксей Карпюк, беларускі пісьменьнік, грамадзкі дзеяч. Жыў і працаваў у Ваўкавыску, Гародні.

5 гадоў таму (2020) – У Кліўлендзе памерла Ірэна Каляда-Сьмірнова, мецэнатка, дзяячка беларускай эміграцыі (ЗША). Нараджэнка в. Падкасоўе (Наваградзкі р-н).

15 красавіка

125 гадоў таму (1900) – У в. Вялікія Азяранкі (Ваўкавыскі р-н) (паводле іншых даных у в. Азяраны Сакольскага пав. (цяпер Беласточчына) нарадзіўся Уладзімер Тамашчык, праваслаўны сьвятар, архіяпіскап Беларускай аўтакефальнай праваслаўнай царквы (Васіль) на эміграцыі. Забіты ў 1970 г. пры загадкавых абставінах.

16 красавіка

85 гадоў таму (1940) – У Яраслаўлі памёр Адам Багдановіч, беларускі этнограф, бацька Максіма Багдановіча. Пахаваны ў Яраслаўлі. Жыў у Гародні.

90 гадоў таму (1935) – У в. Данейкі (Баранавіцкі р-н) нарадзіўся Анатоль Клышка, беларускі пісьменьнік. У 1949-1950 гг. вучыўся і працаваў у Наваградку.

18 красавіка

Міжнародны дзень помнікаў і гістарычных мясьцін.

35 гадоў таму (1990) – Заснавана Гарадзенская абласная краязнаўчая асацыяцыя.

22 красавіка

20 гадоў таму (2005) – У Лондане (штат Антарыё, Канада) памёр Барыс Рагуля, дзеяч нацыянальнага руху ў 1940-ыя гг., кіраўнік Саюзу Беларускай Моладзі на Наваградчыне, пасьля вайны дзеяч беларускай эміграцыі (Бельгія, Канада). Прах разьвеяны ў мясцовасьці Маскока, дзе быў дом Рагуляў. Нараджэнец мястэчка Турэц (Карэліцкі р-н).

26 красавіка

Дзень памяці ахвяраў катастрофы на Чарнобыльскай АЭС (1986 год).

190 гадоў таму (1835) – У Вільні памёр Анёл Доўгірд, філосаф, логік, педагог. Працаваў у Лідзе і Шчучыне.

28 красавіка

125 гадоў таму (1900) – У Кушлянах (Смургонскі р-н) памёр Францішак Багушэвіч, беларускі паэт, празаік, публіцыст, удзельнік паўстаньня 1863-64 гг. Пахаваны ў Жупранах (Ашмянскі р-н).

80 гадоў таму (1945) – На фронце ў час штурму г. Гдыня (Польшча) загінуў Сяргей Крывец (нар. у 1909 г. у в. Сухінічы, паводле іншых звестак на хутары Кустоўка, Мастоўскі р-н), беларускі паэт.

29 красавіка

30 гадоў таму (1995) – У в. Усялюб (Наваградскі р-н) памёр Андрэй Пяткевіч, беларускі паэт. Пахаваны на ўсялюбскіх могілках.

30 красавіка

Сусьветны дзень пародненых гарадоў.

80 гадоў таму (1945) – У в. Сьліжы Пескаўскія (Мастоўскі р-н) нарадзіўся Віктар Дубіцкі, беларускі настаўнік, сябра КХП БНФ.