У 2025 годзе ў Гарадзенскім раёне пяць маладых спецыялістаў праз суд прымусілі вярнуць сродкі, затрачаныя на іх падрыхтоўку. Прычыны няяўкі на працоўнае месца пасля размеркавання ва ўсіх розныя — хтосьці наогул не выйшаў на працу, кагосьці звольнілі. За ўвесь мінулы 2024 год такіх спраў было 14.

Часам выпускнікі проста не прыходзяць на месца размеркавання, тлумачыць суддзя суда Гродзенскага раёна Жанна Сафарэвіч. А бывае, што ўладкоўваюцца на працу, але неўзабаве іх звальняюць за прагулы або з-за прысуду суда, распавядае proregion24.by.

Па законе, калі малады спецыяліст не адпрацаваў належны тэрмін, ён абавязаны вярнуць грошы за навучанне. Можна зрабіць гэта добраахвотна, але калі ён адмаўляецца — пытанне вырашае суд.

Так, адзін з выпускнікоў Скідзельскага каледжа выйшаў на працу ў Гародні, але ўжо праз дзевяць дзён яго звольнілі за прагулы. Паколькі ён не адпрацаваў па размеркаванні і не вярнуў грошы за вучобу, суд абавязаў яго выплаціць каледжу 12 265 рублёў.

Не прыехала на працу ў адну з устаноў культуры Гарадзенскага раёна і маладая спецыялістка, якая вучылася ў Гарадзенскім дзяржаўным каледжы мастацтваў на бюджэтнай аснове па мэтавым накіраванні. Абавязковы тэрмін адпрацоўкі для яе складаў тры гады. Суд пастанавіў, што яна павінна вярнуць у бюджэт 47 846 рублёў.

Быў і такі выпадак: хлопец адвучыўся ў Скідзельскім каледжы, размеркаваўся ў сельгаскааператыў Гарадзенскага раёна. Яго прынялі на працу ў ліпені, але ўжо ў снежні звольнілі, бо яго асудзілі і ён не змог працягваць працу. Грошы за навучанне ён таксама павінен вярнуць.

Яшчэ адна сітуацыя — з выпускніцай каледжа тэхнікі, тэхналогій і дызайну. Яе размеркавалі на швачнае прадпрыемства ў Гародні, але на працу яна не прыйшла і нічога не кампенсавала. Суд абавязаў яе выплаціць 8 530 рублёў.

Акрамя асноўнай сумы доўгу, суд таксама спаганяе з адказчыкаў дзяржпошліну — 5% ад гэтай сумы, і яна ідзе ў бюджэт.

hrodna.life