Новым старшынём Вярхоўнага суда стаў Андрэй Швед, а Канстытуцыйны суд узначаліў Сяргей Сівец. Такое прызначэнне адбылося на так званым Усебеларускім народным сходзе 19 снежня.

Дагэтуль Андрэй Швед цягам пяці гадоў узначальваў Генпракуратуру — з 9 верасня 2020 года. Ён быў адным з актыўных праваднікоў палітычных рэпрэсій. Пры ім Генпракуратура не знайшла фактаў гвалту з боку сілавікоў падчас разгону мірных акцый пратэсту. Таксама Швед адзначыўся расследаваннем “генацыду беларускага народа”: замест таго, каб спыняць парушэнне закону ў цяперашні час, пракуратура занялася падрыхтоўкай судоў над даўно памерлымі нацысцкімі злачынцамі.

Папярэднік Шведа кіраваў Вярхоўным судом амаль 29 гадоў. 83-гадовы Валянцін Сукала наўрад ці атрымае новую пасаду і напэўна пойдзе на пенсію пасля шматгадовага знішчэння незалежнай судовай сістэмы.