Гарадзенскія камунальнікі сталі скардзіцца, што горад апанавалі птушкі чайкі. Па дапамогу яны звярнуліся да навукоўцаў, якія прапанавалі некалькі варыянтаў развязання праблемы, піша мясцовая газета “Перспектыва”.
Гарадзенскія камунальнікі падпісалі дамову з факультэтам біялогіі і экалогіі Гарадзенскага дзяржуніверсітэта імя Янкі Купалы на вызначэнне лакацый чаек і выпрацоўку рэкамендацый па іх выцясненні з асяроддзя пражывання чалавека.
Былі абследаваныя 14 шматпавярховых дамоў у мікрараёнах Дзевятоўка, Альшанка і на праспекце Касманаўтаў. Шмат чаек з’явілася ў раёне вуліцы Паповіча. Там ужо выводзіліся птушаняты, якія восенню адправіліся зімаваць на поўдзень.
Навукоўцы прапанавалі такія метады як прыборку смецця і моху з дахаў, усталяванне загародаў, закрыццё смеццевых кантэйнераў з мадэрнізацыяй накрывак, прымяненне адпужвальных прыладаў.
Паведамляецца, што дазвол на прымяненне ультрагукавых адпужвальнікаў камунальнікі ўжо атрымалі. Але пакуль жыхары пакутуюць на шум.
Гарадзенская праваабарона 