Памежная ахова Польшчы апублікавала 2 лютага відэа з польска-беларускай мяжы, на якім бачна, як група мігрантаў хутка перамяшчаецца ўздоўж памежнага плоту з беларускага боку. Пры гэтым незаконных пераходаў мяжы польскія памежнікі не фіксуюць ужо цягам некалькіх дзён.

«Нягледзячы на ​​тое, што цягам некалькіх дзён мы не фіксавалі спробаў нелегальнага пранікнення на тэрыторыю Польшчы, мы па-ранейшаму назіраем групы мігрантаў, якія рухаюцца з беларускага боку ўздоўж мяжы нашай краіны», – паведамляе Падляскі аддзел Памежнай аховы Польшчы.

Людзей, якія перамяшчаліся ўздоўж польскай мяжы, шукаючы спосабы яе перайсці, бачылі ўчора на памежнай заставе ў Белавежы. Як сцвярджаюць польскія памежнікі, мігранты з’яўляюцца каля мяжы штодзень. Сітуацыю дапамагае кантраляваць электронная загарода, дзякуючы якой памежная ахова адсочвае перамяшчэнні з беларускага боку.

Як паведамляе Беларуская служба Польскага радыё, МУС Польшчы паспрабуе змяніць падыходы да мігрантаў на мяжы з Беларуссю: «стаўленне да іх будзе больш гуманным». Новае кіраўніцтва ведамства гаворыць пра стварэнне пошукава-выратавальных групаў, а таксама пра змены пастановы аб прымусовым вяртанні замежнікаў на беларускі бок (pushback).

З пачатку 2024 года ў Польшчу з боку Беларусі спрабавалі незаконна трапіць 88 чалавек. Між тым, у студзені 2023 года было зафіксавана 1400 спробаў нелегальнага пераходу мяжы. Аднак казаць пра тое, што мігранцкі крызіс на мяжы з Беларуссю скончыўся, пакуль заўчасна, мяркуюць эксперты.

Белсат