У судзе Лідскага раёна абвешчаны прысуд жыхарцы мястэчка Бердаўка пенсіянерцы Таццяне Чэкель, якую звінавацілі ў абразе Лукашэнкі паводле ч. 1 арт. 368 Крымінальнага кодэкса. Справу разглядаў суддзя Аляксандр Мішуроў.

Да суда жанчына знаходзілася пад падпіскай аб нявыездзе.

Па матэрыялах следства, Таццяна Чэкель, знаходзячыся па месцы жыхарства ў стане алкагольнага ап’янення, “наўмысна і публічна выказала фразу, якая ўтрымлівае негатыўную ацэнку Аляксандра Лукашэнкі, выяўленую ў непрыстойнай абразлівай форме”.

У прысутнасці міліцэйскага патруля, якога выклікла пенсіянерка, у якой прапаў мабільны тэлефон, жанчына абражала Лукашэнку. Гэтую фразу чуў сужыцель жанчыны і сведчыў супраць яе ў судзе. 

Суд прызнаў пенсіянерку вінаватай і прызначыў ёй абмежаванне волі без накіравання ў “папраўчую” установу адкрытага тыпу тэрмінам на два гады.

Вясна