Вашай увазе каляндар круглых і юбілейных датаў Гарадзеншчыны на студзень 2025 году.

1 студзеня

210 гадоў таму (1815) – У Варшаве памёр Ян Канопка, ваенны дзеяч ВКЛ, генерал, удзельнік паўстаньня 1794 г.

105 гадоў таму (1920) – У мяст. Турэц (Карэліцкі р-н) нарадзіўся Барыс Рагуля, дзеяч нацыянальнага руху ў 1940-ыя, кіраўнік Саюзу Беларускай Моладзі на Наваградчыне, намесьнік прэзідэнта БЦР на Наваградзкую акругу (1944 г.). Пасьля вайны дзеяч эміграцыі (Бельгія, Канада), віцэ-прэзідэнт Рады БНР.

80 гадоў таму (1945) – У в. Падчарнейкі (Сьвіслацкі р-н) нарадзіўся Міхась Патрэба, беларускі навуковец, педагог, грамадска-палітычны дзеяч.

35 гадоў таму (1990) – Створаны Слонімскі драматычны тэатр.

2 студзеня

140 гадоў таму (1885) – У в. Ракавічы (Шчучынскі р-н) нарадзіўся Багдан Келес-Краўзэ, польскі архітэктар і мастак.

115 гадоў таму (1910) – У в. Малая Альшанка (Гарадзенскі р-н) нарадзіўся Вацлаў Папуцэвіч (у эміграцыі Пануцэвіч), беларускі грамадзкі дзеяч, гісторык, дзеяч эміграцыі (Нямеччына, ЗША).

75 гадоў таму (1950) – У Варшаве памёр Юзаф Ядкоўскі, польскі археолаг, гісторык, краязнавец, калекцыянер, музеязнавец. Нараджэнец Гародні. Пахаваны на варшаўскіх могілках Старыя Павонзкі.

3 студзеня

95 гадоў таму (1930) – У в. Дэгісі (Смургонскі р-н) нарадзіўся Канстанцін Іваноўскі, удзельнік беларускага антыкамуністычнага падпольнага вучнёўскага руху ў Смаргонях у 1949-50 гг.

5 студзеня

215 гадоў таму (1810) – Памёр Казімір Рагоўскі, тэолаг-езуіт, філосаф, педагог. Вучыўся і працаваў у Слоніме, выкладаў у Наваградку.

6 студзеня

415 гадоў таму (1610) – Памёр Андрэй Волан (нар. у 1530 г. у маёнтку Біюцішкі, Ашмянскі р-н), беларускі грамадзкі дзеяч, філосаф, правазнавец, пісьменьнік. Пахаваны ў Біюцішках.

220 гадоў таму (1805) – У Сьвіслачы нарадзіўся Вінцэнт Седлікоўскі, удзельнік паўстаньня 1830 г.

7 студзеня

Раство Хрыстова (Каляды) па юльянскім праваслаўным календары.

100 гадоў таму (1925) – У Варшаве памёр Марыян Абрамовіч, рэвалюцыянер-народнік, публіцыст, дзеяч культуры. Вывучаў на Наваградчыне беларускую мову.

8 студзеня

45 гадоў таму (1980) – У Беластоку памёр Канстанцін Кіслы, беларускі праваслаўны, грамадзка-культурны дзеяч, кампазітар і дырыжор. У пачатку 1930-ых гг. жыў і дзеіў у Слоніме. Пахаваны на беластоцкіх праваслаўных могілках.

10 студзеня

225 гадоў таму (1800) – У м. Кулігоўшчына (Кобрыньскі р-н) нарадзіўся Адам Сузін, удзельнік вызвольнага руху, падарожнік. У 1819 г. скончыў Гарадзенскую гімназію.

11 студзеня

45 гадоў таму (1980) – У Берасьці памёр Антон Ус, беларускі і расейскі грамадзка-культурны дзеяч. Нараджэнец в. Мішуковічы (Івейскі р-н). Пахаваны на берасьцейскіх Гарнізонных могілках.

12 студзеня

40 гадоў таму (1985) – Заснаваны Мастоўскі дзяржаўны музей «Лёс і чалавек».

14 студзеня

45 гадоў таму (1980) – Памёр Пятрусь Граніт (сапр. Іван Івашэвіч), беларускі паэт, педагог. Пахаваны на радзіме ў в. Зачэпічы (Дзятлаўскі р-н).

15 студзеня

140 гадоў таму (1885) – У Варшаве памёр Антон Адынец, паэт, філамат, перакладнік, выдавец. Нараджэнец Гяйстунаў (Ашмянскі р-н).

85 гадоў таму (1940) – Увядзеньне новага адміністрацыйна-тэрытарыяльнага падзелу на далучанай да СССР тэрыторыі Заходняй Беларусі.

40 гадоў таму (1985) – У Гародні адчынены рэспубліканскі музей атэізму і гісторыі рэлігіі (зь верас. 1989 г. – Беларускі дзяржаўны музей гісторыі рэлігіі).

16 студзеня

25 гадоў (2000) – У Гародні адбылася агульнабеларуская сустрэча ветэранаў нацыянальна- вызвольнага руху – вязьняў сталiнскiх канцлягероў.

17 студзеня

40 гадоў таму (1985) – У Беластоку памёр Піліп Кізевіч, дзеяч нацыянальнага заходнебеларускага руху, актывіст ТБШ. Нараджэнец в. Стральцы (Гарадзенскі р-н).

18 студзеня

95 гадоў таму (1930) – У в. Чамяры (Слонімскі р-н) нарадзіўся Сьцяпан Міско, беларускі мастацтвазнавец, культуролаг, дысідэнт.

20 студзеня

120 гадоў таму (1905) – У Слуцку нарадзіўся (паводле інш. зьв. 25 студз.) Ян Пятроўскі, рэлігійны дзеяч, літаратар, выдавец, дзеяч беларускай эміграцыі (Нямеччына, Аўстрыя, ЗША). Працаваў пастарам у Дзярэчыне (Зэльвенскі р-н).

65 гадоў таму (1955) – У Гданьску памёр Лукаш Дзекуць-Малей, беларускі грамадзкі і рэлігійны дзеяч. Нараджэнец в. Малыя Шастакі (Дзятлаўскі р-н). Пахаваны на гарнізонных могілках у Гданьску.

20 гадоў таму (2005) – У Варшаве памёр Ян Новак-Езяранскі (паходзіў з Гарадзеншчыны), польскі грамадзка-палітычны дзеяч, публіцыст, журналіст, які спрыяў беларускаму нацыянальнаму руху. Пахаваны на могілках Павонзкі.

22 студзеня

135 гадоў (1890) – У в. Дзедзіна (Мёрскі р-н) нарадзіўся Ільдафонс Бобіч, беларускі рымска-каталіцкі сьвятар, выдавец. З 1923 г. працаваў пробашчам у Германавічах, у 1930-44 гг. –у Іўі. Пахаваны ў Іўі каля касьцёлу.

24 студзеня

215 гадоў таму (1810) – У в. Гаўя (Івейскі р-н) нарадзіўся Уладзіслаў Брахоцкі, грамадзкі дзеяч, удзельнік паўстаньня 1863-64 гг.

25 студзеня

135 гадоў таму (1890) – У в. Нясутычы (Наваградзкі р-н) нарадзіўся Аляксандар Стагановіч, беларускі грамадзка-палітычны дзеяч, удзельнік БНС, дзеяч эміграцыі (Нямеччына, ЗША).

26 студзеня

35 гадоў таму (1990) – Беларуская мова Вярхоўным Саветам БССР была абвешчана ў Беларусі адзінай дзяржаўнай.

27 студзеня

135 гадоў таму (1890) – У в. Вераскава (Наваградзкі р-н) нарадзіўся Філарэт Родзька, беларускі настаўнік, быў у войску Булак-Балаховіча, дзеяч эміграцыі (ЗША). Працаваў у Вераскаве і Наваградку.

28 студзеня

30 гадоў таму (1995) – У Англіі ў Лонданскім хосьпісе Сьвятога Крыстофера памёр Мар’ян Богуш-Шышка, беларуска-польскі мастак, педагог. Нараджэнец в. Трокенікі (Астравецкі р-н).

31 студзеня

20 гадоў таму (2005) – У Пінску памёр Кастусь Рамановіч, удзельнік падпольнага Саюзу Вызваленьня Беларусі ў Наваградку, вязень савецкіх канцлягераў. Пахаваны на пінскіх могілках Пасянічы. Нараджэнец в. Лозкі (Наваградзкі р-н).