Юрыю Ядкоўскаму 38 гадоў. Ён гарадзенец. Пасля школы атрымаў вышэйшую адукацыю на юрыдычным факультэце Беларускага інстытута правазнаўства. Апошняе яго вядомае месца працы — «Апіс Плюс». Гэта гарадзенская кампанія, якая спецыялізуецца на ўстаноўцы металічных і міжпакаёвых дзвярэй, а таксама займаецца рознымі бытавымі паслугамі.
Юрый некалькі гадоў самастойна вучыць праграмаванне і хоча стаць айцішнікам. Ён скончыў некалькі профільных курсаў і шукаў працу.
Ядкоўскага арыштавалі ў мінулым годзе і змясцілі ў СІЗА. Нядаўна Юрыя засудзілі ў Гарадзенскім абласным судзе паводле ч. 1 арт. 368 (абраза Лукашэнкі) і ч. 1 і 2 арт. 361‑4 Крымінальнага кодэкса Беларусі (садзейнічанне экстрэмісцкай дзейнасці).
Юрыю Ядкоўскаму прысудзілі калонію ці хімію з накіраваннем.
«Экстрэмізмам» улады Беларусі лічаць падпіскі на незалежныя каналы, СМІ, наяўнасць спасылак на іх у сацыяльных сетках ці наяўнасць у сацсетках ці на рэчах беларускай нацыянальнай, далукашэнкаўскай сімволікі. Да «экстрэмізму» залічваюць таксама практычна ўсялякую крытыку ўладаў, афіцыйных гістарычных наратываў ці праявы салідарнасці з Украінай. Шматлікія крымінальныя справы апошняга часу па артыкуле аб «садзейнічанні экстрэмізму» былі звязаныя са «справай Гаюна».
Наша Ніва
Гарадзенская праваабарона 