Экс-палітвязень Мікола Дзядок выпусціў кнігу «Апавяданні з кішэняў. Гарадзенская крытая ў імёнах і тварах». У выданні аўтар расказвае пра сем месяцаў знаходжання ў турме Гародні, піша hrodna.life.
У кнізе распавядаецца пра знаходжанне ў так званых кішэнях — маленькіх адзіночных камерах. «Адзіночках, у якіх увесь час паміраюць людзі», — дадае аўтар.
Вядома як мінімум пра некалькі смерцяў, якія адбыліся ў гарадзенскай турме. Сярод загінулых — мастак Алесь Пушкін, які памёр у рэанімацыі, куды яго даставілі з турмы. Па паведамленнях Міколы Дзядка, у гарадзенскай турме сукамернікі забілі зняволенага Яўгена Шыпуля.
Па словах Дзядка, у кнігу ўвайшлі фрагменты, якія раней ён не агучваў ні ў інтэрв’ю, ні на сваім YouTube-канале.
Актывіст таксама запланаваў прэзентацыю кнігі, якая адбудзецца 31 мая ў творчай прасторы Zolаk у Вільні. На сустрэчы Дзядок раскажа пра метады вярбоўкі, якімі карыстаюцца агенты КДБ у гарадзенскай турме.
Выданнем кнігі займалася беларуская анлайн-бібліятэка Kamunikat. Кнігу выпусцілі на беларускай і расейскай мовах.
Гарадзенская праваабарона 