Алесь Бяляцкі

Старшыня праваабарончага цэнтра “Вясна” і Нобелеўскі лаўрэат Алесь Бяляцкі наведае Гданьск. Ён возьме ўдзел у Касцюшкаўскім форуме.

У пачатку чэрвеня Гданьск стане пляцоўкай для важных дыскусій пра правы чалавека і дэмакратыю з удзелам выбітнага беларускага праваабаронцы. Візіт Алеся Бяляцкага запланаваны ў межах Касцюшкаўскага форуму, які пройдзе другога чэрвеня 2026 года. Ягоны ўдзел стане важным унёскам у дыскусіі, прысвечаныя ролі культуры і грамадзянскай супольнасці ў дэмакратычных пераўтварэннях.

Падчас мерапрыемства Алесь Бяляцкі будзе адзначаны Узнагародай Салідарнасці і Правоў Чалавека Еўрапейскага цэнтра салідарнасці. Гэтая ганаровая адзнака прысуджаецца асобам, якія праявілі выключную адданасць справе абароны правоў чалавека не толькі ў грамадзянскай супольнасці, але і ў такіх сферах, як культура, навука і адукацыя. Уганараванне беларускага праваабаронцы, які ўжо з’яўляецца лаўрэатам Нобелеўскай прэміі міру, звязана з ягоным значным унёскам у здзяйсненне гістарычных зрухаў у галіне правоў чалавека.

Ключавой падзеяй для беларускай супольнасці і ўсіх зацікаўленых стане таксама адкрытая сустрэча з нобелеўскім лаўрэатам, якая адбудзецца ў сераду, 3 чэрвеня, а 18-й. Мерапрыемства пройдзе ў Еўрапейскім цэнтры салідарнасці (ECS), у шматфункцыянальнай зале на першым паверсе. Сустрэча будзе весціся на беларускай мове з забеспячэннем перакладу. Арганізатары падкрэсліваюць, што ўваход на падзею вольны для ўсіх жадаючых. Падчас сустрэчы Алесь Бяляцкі падзеліцца сваім досведам і бачаннем актуальнай сітуацыі з правамі чалавека.

Касцюшкаўскі форум: Спадчына і Свабода (The Kosciuszko Forum: Legacy and Liberty) — гэта міжнародная ініцыятыва, арганізаваная Еўрапейскім цэнтрам салідарнасці. Форум ставіць на мэце аб’яднанне інтэлектуалаў, грамадскіх дзеячаў і праваабаронцаў вакол ідэй свабоды і дэмакратыі, разглядаючы культуру як адну з галоўных рухаючых сіл грамадскага прагрэсу. Пляцоўка форуму служыць для абмену досведам і пошуку шляхоў умацавання еўрапейскіх каштоўнасцей у сучасным свеце.

Вясна